أفضل الكتب الموسيقية العربية

 أفضل الكتب الموسيقية العربية

أفضل الكتب الموسيقية العربية

اهلا وسهلا متابعينا الأعزاء اليوم أضع بين يدي القارئ مجموعة صغيرة ومهمة من الكتب التي تؤرخ الموسيقى وتتضمن العديد من المعلومات الرائعة عن الموسيقى العربية بمختلف أنواعها التى تساعد غير المتخصيين في فهم الموسيقى وأنواعها:

الموسوعة الموسيقية الميسرة 1 تأليف رتيبة الحفني

الكتاب ادانى لمحه مهمه جدا عن الفرق ما بين الموسيقى الغربية و الموسيقى الشرقيه ..

الموسيقى الشرقيه مثلا ارتبطت في نشأتها و تطورها بالصوت البشري بعكس الموسيقى الغربية اللى اعتمدت على الآلة في تطورها .. و طورت فيها .. و مع انى شايفه ان الموسيقى الشرقية أرقى لاعتمادها على الصوت البشري في المقام الأول .. و لكون الصوت البشري ارقى و اكثر تعبيرا وذكاء .. الا انى موش بالاقى مشكله في القراءة عن الموسيقى الغربية و تعلمها اكتسابا للمعرفه و ارضاء لفضولى

كتاب الياقوتة الأولى في تاج الموسيقى العربية تأليف نبيل شوره

هو في الأساس كتاب أكاديمي كان بيدرس لطلاب كلية التربية الموسيقية في بورسعيد ، استعرته من قريبة لي ، و لم تحتجه او تطلبه مني فاحتفظت به الى الآن :) ، الكتاب موضوعه الأساسي كان التاريخ الحديث للموسيقى العربية و ركز اكتر على موسيقى القرن العشرين سيد درويش ، عبد الوهاب ، ام كلثوم ، ليلى مراد ، زكريا احمد ، فريد الأطرش ، اسمهان ، نور الهدى ، عبد الحليم ، صباح ، شادية ،، علي الحجار ، محمد فؤاد ، محمد الحلو ، عمرو دياب ، حميد الشاعري :) و غيرهم من موسيقيين قدامى و محدثين ذكر المؤلف سيرتهم بشكل موجز من خلال كتابه. ،، مع مادة موسيقية عبارة عن نوتات لبعض اغاني هؤلاء المشاهير ، و توضيح لبعض المقامات و المصطلحات الموسيقية .. كتاب لذيذ و شيق على أي حال

:)))

كتاب تذوق الموسيقى العربية تأليف محمود كامل

في مقدمة طبعة مكتبة الاسرة لهذا الكتاب بيعتذرولنا على ان قبل الثورة كانت الكتب بتنشر محاباة ومجاملة لاشخاص !! ..

على كده لو الكتاب دا نفسه موش محاباة ومجاملة .. اومال معقول فيه كتب اسوأ من كده كانت بتنشر محاباة ومجاملة كمان ..؟؟

!!

الكتاب بيتكلم عن ازاي الغرب كان بيحاول بوسايله الدنيئة انه يحجم الموسيقى بتاعتنا ويصنفها تحت الموسيقى الشرقيه بصفه عامه غير معتبر لخصوصيتها (العربية) ابو ام القومية اللي كلت دماغ الناس دي ياجدعان

:)

الكاتب نفسه اتكلم هنا عن ازاي ان الموسيقى في الجزيرة العربية كانت غير متطورة ، في عز ازدهارها في بلاد فارس في المقابل ..

بلاد فارس اللي دخلت الموسيقى لبلادنا مع الفتح الاسلامي واسست لما يسمى اليوم بالموسيقى العربيةوطورتها لنا .. فعلى أي اساس بيشن حضرته الهجوم دا على اللي صنفوا موسيقانا العربية على انها موسيقى شرقيه؟؟! ، كمان الكاتب اغفل خالص ذكر شئ عن الموسيقى المصرية الفرعونية .. !! ، رغم ان ذكره لها و دفاعه عنها كان ممكن يكون ذريعة حقيقية له للتهجم على الغرب ، بحجة انكاره لتراثنا او غيره :)

كتاب ضحل جدا وسطحي من الناحية الثقافية والتاريخية .. لكني حبيت جدااااااا الاضافة التقنية و الفنية الموسيقية اللى فيه و اللى مفيدة جدا لهواة الموسيقى ومتذوقيها

كتاب حياة و أغانى كوكب الشرق أم كلثوم اعداد ام كلثوم محمد هجرس

بالنسبه لى عشان ما اكونش كذابه الكتاب بالنسبه لى جمب الأشعار اللى فيه هو كتاب موسيقي في الدرجة الأولى و دا لأننا كمطربين موسيقى عربية دايما في بروفاتنا و تمريناتنا بنشيل فايلات و كراسات مكتوب او منسوخ فيها كلمات الأغانى العربية لمطربين عرب زي فيروز و فريد و عبد الوهاب و نجاة و غيرهم و اللى اهمهم طبعا (ام كلثوم) فكتب زي دي هتوفر عليه البحث و الكتابة او الطباعه ، و كمان كتب رخيصة جدا !

الكتاب اعداد و تقديم محمد هجرس

التقديم في بداية الكتاب تقديم عادى .. مبتذل ، بعده صفحات قليلة من مذكرات ام كلثوم بتتكلم فيها عن عائلتها و قريتها و قصتها مع الغناء ، بيليها بعض اشعار من اللى غنتها ام كلثوم لكبار الشعراء زي (الاطلال) لابراهيم ناجى ، ، (قوللى و لا تخبيش) لبيرم التونسي ، (سهران لوحدى) ، (ليلة العيد) ، (هجرتك) ، (انت الحب) ، (يامسهرنى ) ، لاحمد رامى شاعر الشباب زي ما كان بيلقب ايامها

و (رباعيات الخيام) للخيام ، اللى نقلها من الفارسيه احمد رامى

(و لم تكن كاملة طبعا ، بل فقط ذاك الجزء الذي غنته ام كلثوم منها لا غير)

..

(اغدا القاك)

للهادى آدمو قصيدة عازفة الناي المشهورة اللى بيقال انها رابعة العدوية اللى بتقول فيها ( أحبك حبين .. حب الهوى ، و حبا لأنك اهل لذاكا ، فأما الذي هو حب الهوى ، فشغلى بذكرك عمن سواكا ، و اما الذي انت اهل له ، فكشفك لى الحجب حتى

اراكا.. )، و غيرهم

كتاب عود تأليف عاطف عبد الحميد

كتاب رائع فعلا للمبتدئين فصّله دكتور عاطف عبد الحميد بطريقة سهلة و جذابة ، الكتاب مرفق معاه سي دي للشرح كمان فساعد كتير في تكميل الموضوع الفنى للكتاب

الكتاب هتلاقيه موجود في قسم الكتب في كلية التربية الموسيقية اللى في الزمالك الدكتور بيدرس هناك و لو دلخت الكليه و رحت تشترى الكتاب عادى ماحدش هيقولك حاجه و الكتاب مع الاسطوانه بحوالى 15 جنيه بس على ما اذكر

كتاب محمد عبد الوهاب الذي لا يعرفه أحد تأليف محمود عوض

مبدئيا محمد عبد الوهاب الله يرحمه بلدياتي و بيمت لى بصلة قرابه من بعيد :)) بس دا عمره ما كان دافع ليه انى اقرا عن تفاصيل حياته بصراحه .. لكن لما الموضوع ارتبط بالحركة الفكرية و الثقافية كلهافي مصر من خلال كتاب عنه الموضوع بقى مهم اكتر بالنسبه لى في البدايه اصدارات مكتبة الاسرة احيانا موش بتتوافق او ما بتتناسبش مع اتجاهى الفكرى او الروحى او .. او

الا انى نادر جدا لما اصادف حاجه من الاصدارات دى بيشوبها السطحية او الابتذال .. كلمة حق :) .. عشان كده لما لاقيت الكتاب دا و من قبل ما ابص فيه او اسمع عنه عرفت انه اكيد موش كتاب من الكتب الرخيصة اياها اللى بتتباع على الرصيف عن الفنانين و المطربين و اللى بتتكلم عن تاريخ ميلادهم و فضايحهم و حميتهم الغذائية و مقاس جزمتهم و الخ الخ

و بتصفح سريع للكتاب و انا في المعرض عرفت دا

و صدق ظنى فعلا .. بجد كتاب مهم جدا على مستوى النقد الفنى و السيرة الذاتية و بشكل ما باعتبره مصدر تاريخي .. لأنه فعلا مهم على المستوى دا كمان .. الكتاب نقل صوره لمصر و للحركة الفنيه و الثقافية فيها في بدايات القرن العشرين .. يعني الموضوع ماكانش عن عبد الوهاب و بس .. الكتاب بيتناول بمناسبة عبد الوهاب اشخاص تانيه كتير كلها اثرت في الحركة الفكرية و الفنيه و الثقافيه في مصر ابرزها كان احمد شوقى طبعا اللى اتفاجأت بتفاصيل عن حياته و عن علاقته بمحمد عبد الوهاب هنا ..

كتاب ممتع موش لازم احرق تفاصيله :) لكن موش هتندموا اكيد ان شاء الله ان قرأتوه

كتاب الإحاطة في أنغام غرناطة تأليف أحمد بيرو

أخيرا الغرناطي في كتاب جامع هو الأول من نوعه في المغرب. والتوقيع لعميد هذا الفن الموسيقي الأصيل الحاج أحمد بيرو. أخيرا صار لفن الآلة أو “الرومي” كما يسميه أهل الطرب الأندلسي، عنوان يمكن اللجوء إليه هو هذا المـصـنَّـف المهم والكبير الموسوم بـ “الإحاطة في أنغام غرناطة”. كتاب يتجاوز عدد صفحاته الـ 600، ويجمع بين دفتيه العشرات من الأشعار والأزجــال والقصائد والموشحــات الموزعة على النوبات الخمسة عشر للطرب الغرناطي.